Indlela Yokuhlinzwa Kwembuzi

Ukuhlinzwa kwembuzi kwenziwa ekhaya uma kunomsebenzi ohlanganisa amadlozi. Kungaba isendaweni yaselokishini, edolobheni noma emaphandleni uma labo bantu bekholelwa emadlozini kufanele bakwenze futhi bakulandele ukuhlinzwa kwalesisilwane. Kusetshenziswa ummese obukhali ukwenzela ukuthi umuntu ozoyihlinza angayizwisi ubuhlungu kodwa kusheshe lokho akwenzayo. Uma imbuzi ihlinzwa ibanga umsindo okuyiwona lomsindo abantu abakholelwa ukuthi ubaxhumanisa namadlozi abo. Abanye abantu bayaye bayihlabe uma behlangane nje bewumndeni ukwenzela ukuthi babe nenyama eningi noma eyenele.

Imvamisa abantu abahlinza imbuzi kufanele babe bane kodwa uma bengenele nabantu ababili bangayihlinza uma bekwazi ngoba kudinga ukuthi babambisane ngesikhathi omunye ehlinza. Kusetshenziswa ummese nendishi yokukhongozela igazi ngoba liyaphekwa nalo ukuze linga chithekeli phansi. Abanye bake basebensise nento ethize ukundlala phansi ukuze kuthi uma sebeyisusa isikhumba noma beyebula inyama ingabhuquzi emhlabathini. Kuye kube uthayela noma uqwembe oluqinile. Uma seyihlinzwa kusikwa emqaleni ngaphambili noma ngaphansi engileni. Bayilinde ize ithule kuba isikhathi esincane esilindwayo. Bese beyayilula ukwenzela ukuthi iqonde ngoba njengoba kade iphuma umphefumulo mhlawumbe ibisifinyela yama ngenye indlela. Bayilula ngokuthi omunye abambe izinyawo zangaphambili omunye zangemuva. Bese beyibeka kulento abazohlinzela kuyo. abantu ababili baba ngasenhloko ababili babe ngasemanqineni angezansi. Uyedwa umuntu osikayo abanye babambile. Baqale ukwebula isikhumba sembuzi ukuze kusale inyama yodwa, lowo ophethe ummese usika isikhumba ngasenqineni bese edonsa ngeminwe kuxebuke isikhumba kuze kuphume ngomlenze kwehlele emzimbeni wayo imbuzi, baphinde basike kusuka esifubeni kuyo phuma emilenzeni yangemuva, baphinde baxebule ngeminwe kuze kuphume ngomgogodla wayo imbuzi.

Ukuhlukaniswa kwembuzi

Isikhumba babeka phezu kwaso inyama, bese bekhipha isisu namathumbu nenyongo namaphaphu nokunye okuyisikhwanyana okuthiwa yingobe noma inanzi. Kuthiwa uma kuhlatshwe ngoba kwenziwa umsebenzi othize kumele igadwe leyonto ngoba abantu abadala bahlala kuyo, kule sisikhwanyana kusuke kukhona ubulongo obuthize, lesosikhwanyana sidliwa wogogo noma amakhehla noma izingane. Ngelinye ilanga sekudlule umsebenzi sekusele abomndeni wodwa iyadliwa, ngoba isuke ibekiwe ngokuyifihla ngoba abantu basaphithizela. Umuntu omdala uyayikhipha ubulongo abomise ebugadile bese egeza lento ebihleli lobulongo iphekwe idliwe. Ubulongo lobu buyasetshenziswa uma bezokhuluma empephweni yabo, yibo obubaxhumanisa nabadala basekhaya uma becela izinto. Nenyongo bayisebenzisa kuthi iphaphu lidliwe nesibindi, amathumbu wona ayagezwa bese ephekwa ahlanganiswe negazi. Inyama yomzimba yona iyaphekwa ngomlilo waphansi ngamanzi nosawoti kubile ndawonye, ubuchopho buphekwa kanye nenyama kodwa bona buphekwa bufakwe kuplasitiki bubile nenyama yonke. Amanqina aphekwa wodwa, aphekelwe izingane nekhanda lihlukaniswe kukhishwe izimpondo sichonywe ensikeni yomnyango, inyama yona iphekwe idliwe.

Isikhumba

Uma kukade kuyinyama nje abazihlabele ngokuthanda siyomiswa kahle isikhumba, ngaphakathi lakade kunenyama khona baye basihuqe ngosawoti ukuze singahlalwa yizimpukane, bese besimweba elangeni besindlale phansi bashayelele ngezipikili singasikwa. Uma sesomile sisebenze ukuba umata noma bazihlalele kuso emthunzini noma balalise abantwana kuso. Kodwa uma ekade kuyimbuzi yomsebenzi mhlawumbe khona okade efakwa isiphandla noma ebonga into ethile ayenzelwe abadala uyasifaka isiphandla. Isiphandla sisikwa kulesikhumba. Kusikwa umucu olingene bese uhlukaniswe phakathi nendawo bese umuntu kufakwa yilowomuntu oqondene nomsebenzi. Ukuze singabi nephunga isiphandla kuye kudingeke ukthi usuhhuqe ngomlotha, noma usiwashe ngensipho eyimpuphu bese usihuqa ngempuphu. 

Indlela Ekuphilwa Ngayo Ezindaweni Zasemakhaya

Ukukhuliswa kwengane emphakathini noma endaweni kwakungabi umsebenzi wabazali baleyongane kuphela kodwa okwesigodi sonke. Obaba uma besebenza kude namakhaya babeshiya amakhosikazi nezingane ekhaya bahambe isikhathi eside, bekujwayeleke ukuthi babuye ngezikhathi zePhasika noma ngoKhisimusi noma uma kushoniwe ekhaya kwakuya ngokuthi usebenza kuphi. Isikhathi esiningi kwakuba ngomama ababevakashela obaba lapho babesebenza khona. Ubudlelwano phakathi kukababa nezingane babungekho ngenxa yalokhu, ngesinye isikhathi kwakutholakala ukuthi ubaba uhamba ekhaya engazi nokuthi usekhulelise umkakhe ezwe esekuhambeni abuye ingane isikhulile njalonjalo.

Omama babeqinisekisa ukuthi ekhaya kulinyiwe futhi nemfuyo ikhona ukuze bakwazi ukuphila. Kwakubayinjabulo ekhaya uma kuzalwa ingane yomfana ngoba phela yayizoqhubeka yakhe umuzi kayise uma eseshonile. Esikhathini sakudala kwakwaziwa ukuthi umsebenzi womuntu wesifazane ukubheka ikhaya akhulise nezingane

Ukuzalwa kwengane

Izibhedlela zingakabikho umuntu wesifazane okhulelwe wayebelethiswa ogogo bendawo uma sekufike isikhathi soklufika kwengane. Bese kubhalwa incwadi iye kubaba aziswa ukuthi uthole mtwana muni, nalapho kusazoyiwa kwamakhelwane kuyofunwa umuntu okuwuye obabhalelayo uma ingakabikhona ingane efundayo kulowomuzi. Ingane ezelwe yayincela ibele ize ibe neminyaka emibili noma emithathu. Yayikhishwa ebeleni ngencumbe noma ngomdoko wamabele ogaywe etsheni noma amahewu idle nokunye ke ukudla iye ijwayele. Ibigqokiswa noma yini ukuvikela amakhaza, uma kubalele ibizihambela nqunu. Amatshitshi namajongozi abebhinca esinqeni kuthi ngenhla, kuthi umuntu osethole umntwana ubefaka ibhayi elifihla amadolo abophe nendwangu emabeleni.

Ekwaluseni

Ingane ikhule ishawa hhayi umzali wayo kuphela nanoma yimuphi umuntu omdala ubewumzali kuye, uma ehlangana naye onile ubemshaya lapho, bekungalindwa abazali bakhe umntwana, njengokuthi uma kufohle izinkomo zakomakhelwane phambi kwakhe bekushawa lowo noma kungezona ezakubo lezonkomo zingalusiwe uye ubeshawa ngoba kuthiwa ubengazishayi ngani izinkomo. Uma ufika ekhaya ububuzwa ukuthi bekwenzenjani mhlawumbe bakuphinde bakushaye, Uma kade umfana elwa wahlulwa abafowabo bazomshaya bethi uvuma ukuhlulwa omunye nangakusasa uzoqhubeka alwe mhlawumbe aze amhlule lowo. Kwakuthi uma umfana egula ekwaluseni bekungashiwo ukuthi akaye kolala bebezama amakhathakhatha aze alulame, umunyana yiwo awawubasiza mebephethwe umkhuhlane, ezikhathini zakudala yayingekho imitholampilo. Imidlalo ebebeyenza babebhukuda noma bakhe izinqola baphule izihlahla bahlanganise, bekugibela oyedwa kulenqola abanye baphushe kushintshanwe, amasondo kube amathanga abawathathe emasimini asale ngesikhathi kade kuvunwa noma badlale umshushuluzo engezinqa endaweni eyehlelayi enotshani, noma bazingele izinyoni nezimbiba.

Amantombazane wona ayelusa uma bengekho abafana kubo. Imisebenzi ejwayelekile yamantombazane ukukha amanzi, kunezikhathi zokukha amanzi hhayi noma inini ayekhiwa ekuseni noma ntambama, ngoba amini ayesengcoliswe izinkomo nabawashayo. Bebefundiswa nokugaya etsheni umbila noma amabele nokupheka nokuhlanza umuzi nokunye. Uma kukhona umuzi onomcimbi amantombazane asendaweni ayahlangana azolekelela ngokukha amanzi nokunye.

Umfana uma engakasebenzi ubeba nalo ihembe elilodwa nebhulukwana aliphiwe ubhuti wakhe noma ubaba wakhe, nezimbadada azikhandele zona noma azikhandelwe abangani bakhe ekwaluseni. Intombi yona ibiba namabhayi amasha ngoba isinesoka elaziwayo bese lithengelwe impahla, vele bekungabalulekile ukuswenka ngalesiyasikhathi bona bebezihlobela ngobuhlalu nangemvunulo yesikhumba kwabesilisa asebesebenza nezintombi esezinamasoka asebenzayo, kodwa futhi esimise iduku kwaziwa endaweni.

Isikole

Bebeya esikoleni sebekhulile mhlawumbe umuntu eneshumi leminyaka noma ngaphezulu eyoqala, uma eyintombazane athi angakwazi ukubhala igama lakhe, nokubhalela ubaba wakhe esemsebenzini ayekiswe ngoba bekuthiwa uzogana bakhalele izimali zabo bemfundisa, umfana yena ubeqhubeka nokufunda, kanti omunye ubeshomana nontanga asiyeke isikole eqe ekhaya ayosebenza, kubo bezwe ngesikade ukuthi akasekho usematohweni. Bekunomkhuba wokuthi uma uyintombazane uzijwayeze ukuhlala ecansini ngoba uma kukekwafika umuntu wangaphandle noma ezidlulela wakubona uhleli esigqikini noma ebhentshini ubaba wakho ubehlawula enkosini ukuthi awuhloniphi uqojama esitulweni, noma uwumfana umithisile ungakashadi ubuhlawula enkosini ugeze izintombi zendawo kuyima uzohlawula lapho umithise khona. Futhi bekuyichilo uma uwumfana ubonakale uphuza noma uphethe ugwayi. 

Inkosi eyayithanda Izinganekwane

Emandulo lapho wawusancinza itshe likhale igazi, kwakukhona inkosi ethize, lenkosi yayizithanda izinganekwane kakhulu. Yayicela abantu besizwe sayo ukuba bayixoxele izinganekwane. Abantu babejwayele ukuyixoxela izinganekwane ezimfushane ezaziyishiya inganelisekile. Kuthe ngelinye ilanga yabiza amabutho ayo yathi kuwona ifuna umuntu ozoyixoxela inganekwane ende, lowo oyokwenza njalo izomuganisela ngendodakazi yayo bese imxoshise nangezinkomo.

Bonke bazimisela ngokuyixoxa inganekwane ngoba befuna indodakazi yenkosi, yabe iyinhle ngempela kwabe kunguphuma langa sikothe. Waqala-ke owokuqala waxoxa kodwa wehluleka ukuxoxa inganekwane ende, balandela nabanye kodwa nabo behluleka. Yathi seyilahle ithemba inkosi kwavela umfana owayenganakekile abantu bengamshayi mkhuba bemthatha noma ikanjani wathi uzoyixoxa inganekwane ende. Yavuma inkosi, wayiqala-ke umfana inganekwane yakhe.

Esizweni esithize kwakukhona inkosi, lenkosi yayijwayele ukuphuma namabutho ayo iyolwa, yayingakaze ihlulwe. Yaqhubeka yaze yafika kwesinye isizwe, lesosizwe sathi uma sizwa ukuthi sizohlaselwa, inkosi yaso yabiza amabutho aso ukuba avune ummbila namabele siwafake enqolobaneni. Nempela amabutho enza njengoba isho inkosi athi eseqedile kwangena iqhwagi enqolobaneni lathath’uhlamvu lwaphuma, laphinde langena lathath’uhlamvu laphuma umfana wayelokhu ephindaphindile inkosi yaze yazumeka.

Kwathi ngesikhathi iphaphama umfana wayesalokhu ephindaphinda into eyodwa. Yabona inkosi ukuthi yinde kakhulu lenganekwane uyophela nini umbila enqolobaneni yathi umfana akayeke. Yabe seyimunika izinto ebimuthembise zona, indodakazi yayo kanye nezinkomo.

yaphela! 

Insimu KaNomkhubulwane

uThangithini Ngcobo onguMaNdlovu ngomkhosi kaNomkhubulwane. Uhlala  esigodini saseMgcweni endaweni yaseNtshangwe. Ukhule endaweni yangakubo omama asebekhulile belima insimu kaNomkhubulwane naye useze waba yingxenye yabo. Ezindaweni eziningi lomkhosi uyahlonishwa, yilapho njalo ngaphambi kokuthi abantu baqale ukulima bahambe baye kolima insimu kaNomkhubulwane. Ngemuva kwalokho bonke abantu bayakwazi ukuqala ukuzilimela emasimini abo.

Akubona bonke abantu ababayingxenye yalabo abasuke bezolima insimu kaNomkhubulwane. Kufanele kube umuntu wesifazane ohlanzekile ngokuthi akekho esikhathini futhi akayanga ocansini nomuntu wesilisa ngesikhathi kulungiselelwa ukuyolima. Ngesikhathi sakudala kwakujwayeleke ukuthi kube ngabantu asebeqinile impela, izalukazi. Usilandise ukuthi kwaba nomyalelo wokuthi abantu ngosuku lwangoMsombuluko abantu endaweni akufanele benze imisebenzi efana nokutheza, ukulima njalonjalo. Kwathi langathile omunye umuntu wesifazane wahamba waya kotheza ngoMsombuluko, wathi uma esengaphakathi ehlathini kwaqhamuka umuntu wesifazane owambuza ukuthi wenzani. Kunenkolelo yokuthi lowo kwakunguNomkhubulwane. Kuthiwa lowomuntu wesifazane owaphula umthetho wabonakala ngokuthi aphume ehlathini isimo sakhe sesishintshile. Lokhu kwenza iningi labantu 

Isiko lokubonwa kwesisu losane osoluzelwe

uma ukhulelwe nokubonwa kwengane uma isizelwe ngabomndeni wakubo kamfana.

Zinengi izinto ezilandelwa yimideni eyahlukene, okuyizinkolelo zakhona njengokuthi uma umuntu wesifazane ekhuleliswe khona abomndeni lowo bacele ukubona isisu sakhe.Lokhu kwenziwa ngesikhathi umuntu eqhutshiwe ukuzobika isisu njengokwesiko noma vele useqala ukugana kulowomuzi. Kubalulekile ukubonwa kwengane ukuthi ngeyakulowomuzi yini noma cha. Abantu abadala babengakhombisi ukungathembi okushiwoyo kodwa babelandela isiko elenziwayo kulowomuzi.

Uma lowo owesifazane okhulelwe esenezinyanga eziyisithupha wayeuelwa ukuthi akhumule ngenhla ame abheke ngaselangeni ekuseni. Abadala babazi ukuthi bafuna ukubona ingane inyakaza kodwa wayengatshelwa owesifazane. Ngokuhlonipha wayenza njengoba eyalelwe ame aveze isisu sakhe sibheke elangeni. Kuthiwa wayeme size sinyakaze noma ingane inyakaze bese beyeneliseka abadala ukuthi ngeyakulowomuzi ingane. Kuthiwa lomkhuba waqala ngokuthi kube nabantu besifazane ababethi bakhulelwe kanti akunjalo. Umakoti wayebala izinyanga kuzwakale esekhala ngokuthi usephuphunyelwe yisisu kuthi uma ebhekwa izalukazi zimfice esezinsukweni zakhe. Kuthiwa lokhu babekwenziswa ukuthi babefuna ukugana kulowomuzi.

Kuthiwa izalukazi kwahamba kwahamba zayibona ukuthi ayikho lento nokuthi abanye omakoti badlala ngazo. Imibono yabantu abadala yayihlonishwa kakhulu ngalesosikhathi futhi kwakunenkolelo yokuthi ayishayi eceleni. Okunye ukuthi kuqala amadoda ayeba nesithembu kube nesimo sokuthi uma omunye womakoti engazali wayekwazi ukuntshontsha ingane kamnakwabo athi ngeyakhe okwakususa ingxabano kodwa kugcine kungaziwanga iqiniso ngoba babekhulelwe ngesikhathi esifanayo. Lokubomwa kwesisu kwakwenziwela ukuthi lesimo. Izalukazi zaqhamuka nalesu ukuze umuntu abonakale futhi aziwe uma ekhulelwe. Ngoba kuqala yayingekho imithola mpilo emakhaya umuntu wayezalela ekhaya ezaliswa izalukazi.

Uma ingane isizelwe izalukazi zasemndenini zazifika ngobuningi bazo ukuzobona ukuthi umntwana owabo yini. Ngoba kwakungenzeka ukuthi umakoti ubekhulelwe nje kanti ingane akusiyona eyakhona lapho ekuthiwa eyakhona. Uma isiboniwe abantu bakhona abadala kuzonqunywa usuku lokuzobona umntwana ngokwesiko lesintu. Kuyagaywa utshwala lwesintu kubanjwe inkukhu egcekeni kuphekwe namadombolo. Bazofika omakhelwane bephethe izipho baphe umntwana bese kuyadliwa.

Uma umntwana ezalelwe ekhabonina

Izikhathi ziyashintsha njengoba amantombazane esekwazi ukuthi athole umntwana engaganile. Uma umuntu ezalele ekhaya kuba abasemzini abaya ukuyobona umntwana. Abahambi bengaphethe lutho kufanele kube khona izipho abamphathela zona. Ngalesikhathi umndeni usuke ufuna ukuqinisekisa ukuthi umntwana ngowabo ngoba abanye umntwana bayamkhumula zonke izingubo azigqokile abhekwe izimpawu zomndeni njengokuthi abanye babheka izinyawo, izandla, izindlebe amabala asemzimbeni njalonjalo. Uma kukhona abakufanisayo bayezwakala bephimisela ukuthi lokho kufana nokukabani.

Kuyothi uma umntwana eseqede izinyanga ezintathu ahambe aye kubokwakhe eseyobonwa yiwo wonke umuntu womndeni. Lapho wonke umuntu osuke ekhona uyamkhunga umntwana ngemali nangezipho. Abanye abantu basakholelwa ekutheni umntwana uyakhungwa ngaphambi kokuthi abonwe khona engeke akhale uma ephethwe. Kuyasiza ukubonwa kwengane uma isencane. Nokuthi ingane ingenzewa isiko kanti akusiyo ayakulowomuzi. Ngoba kukhona izibongo uma ingane yenzelwa usiko lakhona kanti akusiyona eyakhona iyashona. Zonke lezinto ezenziwa ngabantu abadala basuke bevikela izimoeziwubungozi.